1718 bələdiyyə üzrə 35 min 76 nəfərin namizədliyi təsdiq edilib.

Namizədlərin qeydə alınması üçün seçki sənədlərinin təqdimedilmə müddəti başa çatıb. Mərkəzi Seçki Komissiyasının mətbuat xitmətindən bildiriblər ki, Azərbaycan Respublikası Seçki Məcəlləsinin 58-ci maddəsinin tələbinə əsasən, namizədliyin qeydə alınması üçün seçki sənədlərinin dairə seçki komissiyalarına (DSK) təqdim edilməsi üçün müəyyən olunan müddət 13 noyabr, saat 18.00 –da başa çatıb. Qeyd olunan vaxta qədər 1718 bələdiyyə üzrə 35 min 76 nəfərin namizədliyi təsdiq edilib. Namizədliyi təsdiqlənən şəxslərin 34 min 699 nəfəri dairə seçki komissiyalarından imza vərəqələri alıb, həmin şəxslərdən 32 min 32 nəfəri isə namizədliklərinin qeydə alınması üçün imza vərəqələrini və digər zəruri seçki sənədlərini müvafiq dairə seçki komissiyalarına təqdim ediblər. Artıq 1718 bələdiyyə üzrə 28 min 515 nəfərin namizədliyi qeydə alınmışdır. Qeydə alınmış namizədlərin 14 min 506 nəfəri ali təhsilli, 5 min 900 –ü qadındır.
Namizədlikləri qeydə alınan şəxslərdən 9 min 253 nəfəri bitərəfləri, digərləri isə 30 siyasi partiyanı təmsil edirlər. 22 siyasi partiya isə rəsmi olaraq seçki marafonuna qoşularaq bələdiyyə üzvlüyünə namizədlərini irəli sürmüşdür. Bu partiyalardan 19-nun irəli sürdüyü namizədlər DSK-lar tərəfindən qeydə alınmışdır.
Xatırladaq ki, builki seçkilərdə 1718 bələdiyyə üzrə 15 min 682 bələdiyyə üzvü seçilməlidir. Mərkəzi Seçki Komissiyasının rəsmi internet səhifələrinə (www.msk.gov.azl; www.cec.gov.az; www.infocenter.gov.az;) müraciət etməklə bələdiyyə üzvlüyünə namizədlərin irəli sürülməsi və qeydiyyatı barədə məlumat əldə etmək mümkündür.