SMDT bələdiyyə seçkiləri ilə əlaqədar Cəlilabad və Beyləqan şəhərlərində Vətəndaş Forumları keçirib

Noyabrın 27-də Seçkilərin Montironqi və Demokratiyanın Tədrisi Mərkəzi (SMDT) Cəlilabad şəhərində Vətəndaş Forumu keçirib. SMDT-nin Cəlilabad bölgə nümayəndəsi Səməd Ağayev Bələdiyyə seçkilərinin birinci mərhələsi barədə iştirakçılara məlumat verib. Regional İnformasiya Mərkəzinin sədri, iştirakçı Ramin Qəniyev vətəndaşların ictimai siyasi fəaliyyətdə passiv iştirakını, gənc nəslin ölkənin ictimai sferasında faəliyyətsizliyini, yerli QHT-lərin fəaliyyətinin zəif olmasını vurğulayıb. Azərbaycan Xalq Cəbhəsi Partiyasının region üzrə təmsilçisi Təzaxan Mirələmli seçkiqabagı proseslərdə qanun pozuntuları, seçki günü müşahidəçiliyin təşkil olunması, eləcə də seçkisonrası proseslərin izlənməsinin vacibliyi ilə bağlı baş verən pozuntulardan danışıb. Ümid partiyasının Cəlilabad rayon təşkilatının sədri Aslan Əliyev bələdiyyə seçkiləri ilə bağlı namizədliyini irəli sürən siyasi partiya nümayəndələrinə olunan təzyiq nəticəsində partiya üzvlərinin namizədliyini geri götürməsini öz çıxışında vurğulayıb. Jurnalist Sabir Hətəmov isə bölgədə mətbuatın olduqca zəif fəaliyyətinə və biristiqamətli yazıların mövcudluğuna öz kəskin münasibətini bildirib.

Noyabrın 29-da Beyləqan rayonunda keçirilən Forumda Beyləqan bölgə koordinatoru Əmir Orucov iştirakçılara bələdiyyə seçkilərinin ilə bağlı məlumat verib. Forumda SMDT-nin bələdiyyə seçkilərində namizədlərin irəli sürülməsi və qeydiyyatı mərhələsi üzrə apardığı müşahidənin nəticələri müzakirə edilib. İştirakçılar seçkiqabağı təqyiqlərin olduğunu bildiriblər.
Keçirilən forumlarda 36 nəfər iştirak edib.

Qeyd edək ki, Vətəndaş Forumları Kanada səfirliyinin maliyyə və texniki dəstəyi ilə SMDT tərəfindən həyata keçirilir.

Xatırladaq ki, SMDT-ni 14 may 2008-ci ildə dövlət qeydiyyatı Ədliyyə Nazirliyinin iddiası əsasında Xətai rayon məhkəməsində ləğv edilmiş Seçki Monitorinq Mərkəzinin üzvləri təsis ediblər. SMDT-nin əsas məqsədi Azərbaycanda azad və ədalətli seckilərin kecirilməsi, vətəndaşların dovlət idarəetməsində və demokratiyanın inkişafı prosesində fəal iştirakına yardım etməkdir.